Жеке кабинет
Кәсіподақтар күні: Қазақстандағы кәсіподақ қозғалысына – 120 жыл
09.10.2025Қазақстанда 10 қазан күні Кәсіподақтар күні аталып өтеді. Биыл бұл мереке еліміздегі кәсіподақ қозғалысының 120 жылдығы және Қазақстан Республикасы Кәсіподақтар федерациясының 35 жылдығымен тұспа-тұс келіп отыр.
Осы айтулы мереке қарсаңында «Қызмет» салалық кәсіподағының Астана қалалық филиалының төрағасы Атақозы Нұрланов «Астана қаласы әкімінің аппараты» ММ және «Астана-Өрнек» ЖШС алғашқы кәсіподақ ұйымдарына барып, кәсіподақ мүшелерін кәсіби мерекемен құттықтады. Ол белсенді азаматтық ұстанымдары, қоғамдық қызметі және еліміздегі кәсіподақ қозғалысының дамуына қосқан елеулі үлесі үшін алғысын білдірді.
Құттықтау сөзінде Атақозы Нұрланов Қазақстандағы кәсіподақтардың тарихындағы маңызды кезеңдерге тоқталды. Еліміздегі алғашқы кәсіподақ бірлестігі 1905 жылдың 6 желтоқсанында Қарағанды облысындағы Успен кеніші базасында құрылып, оның құрамында небәрі 6 адам болған. 1925 жылы Қызылордада кәсіподақтардың алғашқы съезі өтті. Кеңестік кезеңде кәсіподақ қызметін 1948 жылы құрылған Қазақ кәсіптік одақтар кеңесі басқарды.
Қайта құру кезеңімен бірге, 1990 жылдың қазан айында өткен XIV съезде билік пен саяси партиялардан тәуелсіз Қазақстан Республикасы Кәсіподақтар федерациясы құрылды. 1992 жылы бұл ұйым қазіргі атауын — ҚРКФ (ФПРК) алды.
«2025 жыл – Мемлекет басшысының Жарлығымен Жұмысшы кәсіптер жылы деп жарияланды. Қазақстандағы кәсіподақ қозғалысының 120 жылдығы дәл осы жылға сәйкес келуі – үлкен символ. Біз өзіміздің басты миссиямыз — жұмыскерлердің еңбек құқықтарын қорғау мен әлеуметтік әріптестікті нығайту ісін жалғастырып келе жатқанымызды мақтан тұтамыз. Кәсіподақ қозғалысының дамуына үлес қосып жүрген, қоғамдық істерге белсене араласатын және кәсіподақ бірлігінің идеясын қолдайтын барлық азаматтарға алғысымды білдіремін», — деді өз сөзінде Атақозы Нұрланов.
Кездесу барысында кәсіподақ белсенділері марапатталды:
«Өз ісінің маманы» медалімен — Қайрат Мұратұлы Күшербаев, «Астана-Өрнек» ЖШС-нің бас энергетигі, бастауыш кәсіподақ ұйымының төрағасы;
«Мемлекеттік қызметкерлер кәсіподағының үздігі» төсбелгісімен — Арслан Мұқсынұлы Тобагулов, Астана қаласы әкімдігінің «Жанұя» отбасылық институтты қолдау орталығы» КММ-нің жинақтау-талдау бөлімінің басшысы, бастауыш кәсіподақ ұйымының төрағасы марапатталды.
Сондай-ақ, салалық кәсіподақтың Астана қалалық филиалы атқару комитетінің атынан Қазақстан Республикасы шипажайларында демалу үшін 20% жеңілдік беретін сертификаттар табысталды.
