Қамқор жандарға құрмет: Салалық кәсіподақ әлеуметтік мекемелердің медицина қызметкерлерін кәсіби мерекесімен құттықтады

Медицина қызметкерлері күніне орай «Қызмет»Мемлекеттік, банктік мекемелер және қоғамдық қызмет көрсету қызметкерлерінің салалық кәсіптік одағының Алматы қаласы бойынша Төрайымы Данагүл Айнақұлова «Шаңырақ» және «Парасат» әлеуметтік қызмет көрсету орталықтарына барып, мекемелердің медициналық персоналын айтулы мерекемен жылы лебізбен құттықтап, олардың өлшеусіз еңбегін, мейірімділігі мен өз ісіне деген адалдығын атап өтті.

«Қоғамдық қызмет көрсету және әлеуметтік қорғау саласында аянбай еңбек етіп жүрген медицина қызметкерлері ерекше миссияны атқарады. Сіздер көмекке мұқтаж жандарға тек кәсіби қолдау көрсетіп қана қоймай, жүрек жылуын да сыйлайсыздар. Төзімділіктеріңіз, сезімталдықтарыңыз бен жоғары кәсіби міндетке адалдықтарыңыз үшін алғыс айтамын», — деді Данагүл Анақұлова.

Мерекелік іс-шаралар барлық арнаулы әлеуметтік қызмет көрсету орталықтарын қамтыды. Салалық кәсіподақ атынан медициналық ұжымдар үшін әртүрлі форматтағы құрмет көрсету шаралары ұйымдастырылды:

Салтанатты жиындар мен марапаттаулар: Үздік қызметкерлер мінсіз еңбектері мен мамандыққа адалдықтары үшін құрмет грамоталарымен, алғыс хаттармен марапатталды.

Тимбилдингтер мен ұжымдық басқосулар: Әріптестер бейресми жағдайда демалып, ұжымдық рухты нығайтуға және ауызбіршілікті арттыруға мүмкіндік алды.

Спартакиадалар мен спорттық жарыстар: Бірқатар орталықтарда мереке салауатты өмір салтын ұлықтау бағытында өтіп, ақ халатты жандар белсенді де тартысты сайыстарда бас қосты.

Салалық кәсіподақ әлеуметтік мекемелердің барлық медицина қызметкерлеріне күнделікті игі еңбектері үшін терең алғысын білдіреді және оларға зор денсаулық, бақ-береке мен жауапты жұмыстарында жаңа табыстар тілейді!