Әлеуметтік сала қызметкерлерімен кездесті

«Қалың қалай, бастауыш ұйым» акциясы аясында «Қызмет» салалық кәсіподағының мүшелік ұйымы – Шымкент қаласы жұмыспен қамту және әлеуметтік қорғау басқармасының «№2 арнаулы әлеуметтік қызметтер көрсету орталығы» коммуналдық мемлекеттік мекемесінде «Қызмет» салалық кәсіподағы Шымкент қалалық филиалының төрағасы Серік Әуесханов және мекеме басшысының орынбасары Асқар Усенбаев пен кәсіподақ төрайымы Абуова Клара орталықтың кәсіподақ мүшелерімен кездесу өткізіп, қал-жағдайларымен танысты.

Кездесу қорытындысымен өткізілген жиында «Қызмет» салалық кәсіподағы Шымкент қалалық филиалының төрағасы Серік Елемесұлы мекеменің қызметкерлерін алда келе жатқан «16 желтоқсан – Қазақстан Республикасының Тәуелсіздік күні» мерекесімен құттықтап, бірнеше кәсіподақ мүшелеріне кәсіподақ наградаларын табыстады.

Атап айтқанда, орталықтың палата санитары Есбергенова Меруерт Амангелдіқызы, дәрігер күтушісі Тілеубердиева Нұрбала Жасұзаққызы және аспазшысы Тұрабаева Азиза Берікбайқызы филиалдың «Еңбек озаты» төс белгілерімен, мекеменің бақылаушы санитары Нысанбаев Бегімжан Қайратұлы және дәрігер психиатры Айтмырзаева Гүлмира Тоғысбайқызы «Құрмет Грамоталарымен» марапатталды.

Жиында орталық директорының орынбасары Эльмира Байболова «Қызмет» салалық кәсіподағына шынайы алғысын білдіріп, алдағы істеріне сәттілік тіледі.

Салтанатты жиын соңы концерттік бағдарламаға ұласты.