Еңбек инспекциясының қызметкерлеріне құрмет көрсетілді

«16 желтоқсан – Қазақстан Республикасының Тәуелсіздік күні» мерекесі қарсаңында «Қызмет» салалық кәсіподағы Шымкент қалалық филиалының төрағасы Әуесханов Серік Елемесұлы Қазақстан Республикасының Еңбек және халықты әлеуметтік қорғау министрлігі Мемлекеттік еңбек инспекциясы Комитетінің Шымкент қаласы бойынша департаментінде болып, жаңадан тағайындалған департамент басшысы Жеңіс Тілләбайұлы Мақұлбаевпен кездесіп, алдағы уақыттағы жұмыскерлер мен қызметкерлердің еңбек құқын қорғауда атқаратын жұмыстарына сәттілік тілеп, департамент қызметкерлерімен кездесу өткізіп, еңбек қатынастарының бүгінгі жағдайына шолу жасап, алдағы кезде бірлесе атқаратын жұмыстарының басымдық бағыттарын айқындады.
Қорытынды жиында «Қызмет» салалық кәсіподағы Шымкент қалалық филиалының төрағасы Серік Елемесұлы департамент қызметкерлерін «16 желтоқсан – Қазақстан Республикасының Тәуелсіздік күні» мерекесімен құттықтап, бірлесе атқарған жұмыстардың нәтижесімен бірқатар қызметкерлерге кәсіподақ наградаларын табыстады.

Атап айтқанда, «Қызмет» салалық кәсіподағы Шымкент қалалық филиалының «Еңбек озаты» төс белгілерімен Қазақстан Республикасының Еңбек және халықты әлеуметтік қорғау министрлігі Мемлекеттік еңбек инспекциясы Комитетінің Шымкент қаласы бойынша департаментінің бөлім басшылары Шарипов Ғалымжан Жасұзақұлы, Мамадалиев Әлжан Өмірбекұлы және Дуйсенбаев Нұркелді Құрманбекұлы, филиалдың «Құрмет грамоталарымен» департаменттің бас мамандары Баймбетова Айнұр Амангелдіқызы және Әлімхан Мейіршат Оразмұратқызы, сондай-ақ филиалдың «Алғыс хаттарымен» департаменттің бас мамандары Күдебек Бағила Баймаханқызы және Жақсылық Айнұр Мырзахметқызы марапатталды.
Жиын соңында департамент басшысы Жеңіс Тілләбайұлы «Қызмет» салалық кәсіподағының атына алғысын айтып, жұмыстарына сәттілік тіледі.