«Тең қоғам» әлеуметтік қолдау орталығында жаңа жылдық шырша мерекесі өтті

«Қызмет» мемлекеттік, банк мекемелері және қоғамдық қызмет көрсету қызметкерлерінің салалық кәсіподағы Шымкент қалалық филиалына қарасты “Тең қоғам” әлеуметтік қолдау орталығында “Ғажайып жаңа жыл 2024” атты мерекелік іс-шарасын өткізді.
Мүгедектігі бар азаматтар мен ерекше балаларға ұйымдастырылған жаңа жылдық шырша меркесінде концерттік бағдарлама, сиқыршы көрінісі, би және түрлі ойын сауықтар көрсетіліп, сыйлықтар табысталды.
Мерекелік шараға арнайы Шымкент қаласы жұмыспен қамту және әлеуметтік қорғау басқармасының басшысы Жанат Өтебаева мен “Тең қоғам” әлеуметтік қолдау орталығының директоры Ерсұлтан Амзеев арнайы қатысып, қызмет алушыларды мерекелерімен құттықтап, шынайы тілектерін жеткізді.

Орталықта жыл басынан бері 13 мыңға жуық мүгедектігі бар азаматқа ақпараттық-консультациялық, әлеуметтік, құқықтық, жұмысқа орналасуға кеңес беру, психологиялық көмек түрлерін көрсеткен.

Мамандардың көмегімен бір мыңнан астам адам әлеуметтік қызметтер көрсету порталы арқылы көмекші техникалық құралдарын алған.
Орталық мамандары ерекше жандарға әлеуметтік қолдау көрсетіп қана қоймай, әр мерекеде түрлі іс-шаралар ұйымдастырып, оларға ерекше көңіл күй сыйлап келеді.