Шымкентте «Жыл көшбасшылары – 2023» премиясының жеңімпаздары марапатталды

«16 желтоқсан – Қазақстан Республикасының Тәуелсіздік күні» мерекесіне орай, «Қызмет» салалық кәсіподағы Шымкент қалалық филиалының құрамындағы мүшелік ұйым – Шымкент қаласының ішкі саясат және жастар істері жөніндегі басқармасының «Жастар ресурстық орталығы» коммуналдық мемлекеттік мекемесінің ұйымдастыруымен «Жыл көшбасшылары – 2023» премиясының иегерлері марапатталды.
Жыл сайын дәстүрлі түрде өтіп келе жатқан үздіктерді марапаттауға – Шымкент қаласының әкімі Ғабит Әбдімәжитұлы Сыздықбеков қатысып, шараның маңыздылығына тоқталып, үздіктерді марапаттады.

Байқаудың негізгі мақсаты – Шымкент қаласында мемлекеттік жастар саясатының дамуына, елдің саяси және қоғамдық өміріне белсене араласып, қоғамның түрлі салаларындағы жастарға қолдау көрсету, жетістіктерін насихаттау, жастардың рухын көтеру және ынталандыру болып табылады.
Аталған байқауға Шымкент қаласының 14-35 жасқа дейінгі 176 жастан өтінім түсіп, комиссия отырысының шешімімен 20 жас «өз салаларының үздігі» деп танылған.
Жыл көшбасшыларына Шымкент қаласы әкімінің атынан дипломдар, арнайы статуэткалар мен қаржылай сыйақылар табысталды.