Жеке кабинет
«Қызмет» Салалық кәсіподағының XII Съезі: қорытындылар, стратегиялық шешімдер және жаңа мүмкіндіктер
03.06.20252025 жылғы 30 мамырда «Қызмет» мемлекеттік, банк мекемелері және қоғамдық қызмет көрсету ұйымдары қызметкерлерінің салалық кәсіптік одағы» ҚБ-нің XII Съезі өтті. Бес жылда бір рет өткізілетін бұл маңызды форум 2020–2025 жылдар аралығындағы кәсіподақ қызметінің қорытындысын жасап, алдағы кезеңге арналған басым міндеттерді талқылап, стратегиялық бағытты айқындайтын маңызды алаңға айналды.
Съез жұмысына еліміздің барлық өңірлерінен келген делегаттар, кәсіподақ көшбасшылары, мемлекет қайраткерлері, әлеуметтік әріптестер, сондай-ақ Ақтөбе облыстық филиалы жанындағы «Келешек» Жастар кеңесінің өкілдері қатысты.
Құрметті қонақтар қатарында – Қазақстан Республикасы Премьер-Министрінің кеңесшісі Ералы Тоғжанов, Қазақстан Республикасы Кәсіподақтар федерациясының төрағасы Сатыбалды Дәулеталин, сондай-ақ Президент Әкімшілігі мен басқа да мемлекеттік органдардың өкілдері болды.
Съездің күн тәртібіне кәсіподақтың есептік баяндамалары мен басқарушы және бақылаушы органдардың сайлауы, Жарғыға енгізілетін өзгерістерді талқылау, «Қызмет» кәсіподағының 2025–2030 жылдарға арналған даму бағдарламасын бекіту, Парламентке, Үкіметке, әлеуметтік әріптестер мен кәсіподақ қауымдастығына үндеу жолдау, сондай-ақ кәсіподақ қозғалысына елеулі үлес қосқан белсенділерді марапаттау сияқты негізгі мәселелер енгізілді.
Съез делегаттарына ҚР
Премьер-Министрінің кеңесшісі Ералы Тоғжанов құттықтау сөз сөйледі. Өз сөзінде
ол:
«Қызметкерлердің құқықтарын қорғауда, әділетті еңбек жағдайларын қалыптастыруда
және азаматтардың лайықты өмір сүруін қамтамасыз етуде кәсіподақтардың рөлі –
аса маңызды. Мемлекет пен кәсіподақ қозғалысы халықтың ортақ игілігі жолында
бірлесе әрекет етуі тиіс», – деп атап өтті.
ҚР Кәсіподақтар федерациясының төрағасы Сатыбалды Дәулеталин еңбек заңнамасын дамытуға және еңбек жағдайларын жақсартуға кәсіподақтардың қосқан үлесіне тоқталды. Жұмысшы мамандықтары жылы аясында басты назар еңбеккерлердің құқықтарын қорғау жүйесін нығайтуға және адамға бағытталған еңбек философиясын ілгерілетуге аударылды. Ол мемлекет – жұмыс беруші – кәсіподақ арасындағы үшжақты өзара іс-қимылдың, Бас келісімді орындаудың және Республикалық үшжақты комиссияның өкілеттіктерін кеңейтудің маңыздылығын ерекше атап өтті.
Сонымен қатар, ең төменгі жалақы мөлшерінің артуы, оның есептелуінің ашықтығының артуы және еңбекақы төлеу жүйесін одан әрі жетілдіру қажеттігіне назар аударылды. өндірістік жарақат мәселелері, Қауіпсіз еңбек тұжырымдамасының қабылдануы және техникалық еңбек инспекторларының рөлін күшейту қажеттігі ерекше атап өтілді.
Халықаралық ынтымақтастықты жандандыру мәселесі де қозғалды – Халықаралық кәсіподақтар конфедерациясына қайта мүше болу, ХЕҰ басшысының сапары және Еуропа кәсіподақтарының жазғы мектебінің Қазақстанда өткізілуі осы бағыттағы маңызды қадамдар ретінде көрсетілді.
Сөзінің соңында Сатыбалды Дәулеталин кәсіподақ белсенділеріне алғыс айтып, олардың еңбеккерлердің құқықтарын қорғаудағы маңызды рөлін атап өтті.
Съез жұмысына Қазақстанның мұнай-газ кешені салалық кәсіподағының төрағасы Сұлтан Қалиев қатысты. Ол «Қызмет» кәсіподағы мен оның төрағасы Мирболат Жақыповтың жетістіктерін жоғары бағалап, Қазақстандағы кәсіподақ қозғалысын біріктіру қажеттігін атап өтті. Оның пікірінше, Германия тәжірибесіне сүйене отырып, салалық кәсіподақтарды біріктіру арқылы миллиондаған жұмыскерлердің мүддесін тиімді қорғауға болады. Ол сондай-ақ еңбек заңнамасын жаңарту және еңбек мәселелері бойынша ұлттық баяндамалар дайындаудың маңыздылығына тоқталды.
«Қызмет» салалық кәсіподағының төрағасы Мирболат Жақыпов атқарылған жұмыс жөнінде есеп берді. Ол соңғы бес жылда бастауыш кәсіподақ ұйымдарының саны 12,5%-ға артып, 2 883-тен 3 244-ке дейін өскенін, ал кәсіподақ мүшелерінің саны 15,15%-ға көбейіп, 102 045 адамға жеткенін айтты.
«Қызмет» кәсіподағы төрағасының Қазақстан Республикасының Үкіметіне және «Азаматтарға арналған үкімет» корпорациясы» КЕАҚ басшылығына жолдаған өтініші мен белсенді жұмысының нәтижесінде республикадағы медициналық-әлеуметтік мекемелер мен халыққа қызмет көрсету орталықтары қызметкерлерінің лауазымдық жалақысы мен үстемақылары едәуір артты.
Сондай-ақ, кәсіподақ басшылығының еңбек ақысын төлеуде медициналық-әлеуметтік ұйымдарда еңбек ететін медицина қызметкерлері мен педагог мамандарға қатысты орын алып жатқан кемсітуге байланысты Еңбек және халықты әлеуметтік қорғау министрлігіне, Денсаулық сақтау министрлігіне және Оқу-ағарту министрлігіне жолдаған ресми хаттарына сәйкес, аталған министрліктер бұл мәселені қолдап, тиісті салалық келісімдер нормаларын кеңейтуді принципті түрде мақұлдады.
2024 жылдың қорытындысы бойынша мемлекеттік қызметшілерге сыйақы төлеуді қолдау мақсатында Қазақстан Республикасының Үкіметі мен Президент Әкімшілігіне жедел түрде жолданған кәсіподақ өтінішінен кейін, Мемлекет басшысы Қасым-Жомарт Кемелұлы Тоқаев «Қызмет» кәсіподағының барлық талаптарын қолдады.
2024 жылы кәсіподақ 3 028 ұжымдық шарт жасасты, оларды орындауға жұмсалған қаражат 18 есеге артты. Кәсіподақ мүшелеріне көрсетілген материалдық көмек 21 есеге өсіп, шамамен 500 млн теңгені құрады. Бүгінгі таңда салалық деңгейде 342 өндірістік кеңес, 554 кәсіподақ инспекторы жұмыс істейді, еңбек жағдайларына қатысты 300-ден астам тексеру жүргізілді. Құқық қорғау саласында 11 заңгер жұмыс істейді, олар 2 758 өтінішті қарастырды.
Съез делегаттары Салалық кәсіподақтың жұмысын қанағаттанарлық деп танып, Мирболат Жақыповты «Қызмет» салалық кәсіподағының төрағасы қызметіне сайлануын бірауыздан қолдады. Сондай-ақ, Съез барысында Салалық кәсіподақтың 2025–2030 жылдарға арналған даму бағдарламасы бекітілді. Құжатта бірқатар басым бағыттар айқындалған: құқықтық қорғау қызметін күшейту, бастауыш ұйымдарды дамыту, кәсіподақ мүшелігін кеңейту және әлеуметтік әріптестікті нығайту.
Съез кәсіподақ қозғалысының кемелдігін және жауапкершілігін айқын көрсетті, сондай-ақ «Қызмет» ұйымының жаңа сын-тегеуріндерге дайын екенін және әділетті, әлеуметтік бағдарланған қоғам құру жолындағы белсенді рөлін көрсетті.
Съез соңында Салалық кәсіподақтың қызметі туралы деректі фильм көрсетіліп, марапаттау рәсімі өтті.
Бағдарламаны жалғастыра отырып, Мирболат Жақыпов барлық қатысушыларға жемісті жұмыстары үшін алғыс білдіріп, еңбеккерлердің құқықтарын қорғауда бірлік пен ынтымақтың маңыздылығына тоқталды. Саланың кәсіподақ қозғалысының дамуына елеулі үлес қосқан белсенділер мен ардагерлер ерекше аталып, марапатталды.
